Espai Catalunya Topalekua gure komunitateen arteko loturak sendotzeko sortu zen.  Izan ere, kataluniar asko bizi gara Euskal Herrian, eta badakigu zer-nolako interesa pizten duten hemen Kataluniarekin lotura duten gai guztiek; eta aitzitik, jakina da zer-nolako pasioa pizten duen Katalunian Euskal Herriarekin zerikusia duen edozerk.
Hori dela eta, hasieran Kataluniako Etxea izan behar zuena gerora eraldatu eta hemen aurkezten dizuegun elkartean gorpuztu da. 

Zein den desberdintasuna

Kataluniako Etxea beren jaioterritik kanpo bizi diren kataluniarren topalekua izango litzateke, hain zuzen ere gertaerak gogoratzeko, egun eta tradizio jakinak ospatzeko leku bat.
Gure asmoa, ordea, haratago doa: Euskal Herrian bizi diren kataluniarren topaleku izan nahi dugu, baina, horretaz gain, kataluniar kultura bere adierarik zabalenean, turismoa eta merkataritza ere sustatu nahi ditugu, lan horrek merezi duen profesionaltasunez; betiere hain harrera ona egin digun euskal kulturarekin hartu-emanak izateko daukagun borondatea gogoan izanda.

2005eko uztailean, Kataluniako Generalitateak KANPOKO KATALUNIAR KOMUNITATE izendatu gintuen, horrek berekin dakarren guztiarekin; hau da, elkartearentzat ofizialtasuna eta bazkideentzat onurak.